الأسئلة الشائعة

ما هي فكرة منصة حصة؟

“حصة” هي منصة تدريب إلكترونية، تفتح المجال قدام المتدربين والمدربين انهم يرفعوا مستوى تعلمهم وعملهم من “الوصول المحدود” في عملية التعلم والتدرب التقليدية، إلى “الوصول العالي” للمعلومة وللمستهدفين منها في عملية التعلم والتدرب الإلكتروني.

شن معناه الكلام هدا؟ ? هدا الكلام معناه إن أي حد من أي مكان في العالم يقدر يسجل في المنصة كمتدرب ويستفيد من التدريبات الموجودة فيها في أي مجال هوا حابه، وبرضو أي حد في العالم يقدر يسجل كمحاضر ويقدم محتوى تدريبي مميز في مجاله.

باهي إنت كمتدرب، شن يخليك تسيب اليوتيوب أو أي منصة ثانية وتعلم في “حصة”؟

أول شي، حصة بيئة خاصة بالتعلم، يعني مافيهاش أي تشويش على تركيزك بأي مواضيع جانبية، بش تساعدك تحافظ على تركيزك ووقتك، خاصة إنها بيئة تفاعلية وداعمة، من خلال صفحات من المناقشة الخاصة بكل تدريب، الي تمثل حلقة وصل بين المتدربين في بعضهم وبين المتدربين والمدرب متعهم. هدا غير المرونة في تصميم التدريبات وطريقة حضورها.

أطلقت المنصة هادي بمبادرة من مؤسسة الحوار والمناظرة، طامحين إنها تساهم في تطوير مفهوم التدريب والتعليم في ليبيا وتساعد في رفع الكافاءات.

كيف نكون حساب خاص بيا على منصة “حصة”؟

أحلى حاجة في “حصة” إن كل شي فيها سلس وبسيط، و”تسجيل حساب” جديد مش استثناء.

1. أول حاجة لازم تعبي جميع البيانات المطلوبة في صفحة التسجيل.

2. في خانة البريد الالكتروني، لازم تحط بريد الكتروني “مفعل” وتستخدم فيه، أو على الأقل حافظ كلمة السر متعه وتقدر تخش عليه، سواء كان @gmail, @yahoo, @outlook, @hotmail …إلخ

3. وبعدين تضغط على زر أنشئ حساب.

4. خش على البريد الالكتروني متعك الي حطيته، تلقانا بعتنالك رسالة، اضغط على خاصة تفعيل الحساب في الرسالة وهكي تكون بديت واحد من عائلة حصة وتقدر تحضر أي تدريب فيها.

ملاحظة: ان لم تجد الرسالة في الصندوق الوارد، تفقد الرسائل المزعجة/الغير مرفوب فيها أو البريد الغير هام.

ماهي المعلومات المطلوبة لإنشاء حساب؟ 

بش تدير حساب في منصة “حصة”، لازم تعبي كافة البيانات الموجودة في صفحة التسجيل. وهي مجموعة معلومات تساعدنا نعرفوك أكثر ونعرفوا شن يمشي معاك من تدريبات، ومتمثله في: 

  • البريد الإلكتروني:  ممكن يكون @gmail, @hotmail, @yahoo, @outlook أو أي مزود خدمة بريد الكتروني اخر انت تستخدم فيه، أهم شي يكون مزال فاعل وتقدر تفتحه أو توصله، لأنك بتحتاج تخشله بش تفعل حسابك. 
  • إسمك ولقبك. 
  • تاريخ ميلادك. 
  • رقم تلفونك. 
  • تخصصك الدراسي. 
  • جنسيتك. 
  • مكان اقامتك.
  •  

كيف نحصل شهادة من التدريب؟ 

لكل تدريب شروطه الخاصة للحصول على الشهادة، بعضها يتطلب منك اتمام التدريب بالكامل، وبعضها يشترط عليك حل التمرينات، بس في الاخير بالتزامك حتحصل شهادة أي كانت الشروط. 

كيف تصبح مدرباً مع حصة؟. 

من خلال حصّة تقدر توصل فينا وتكون صانع محتوى تعليمي عبر حصولك على حساب مدرب. ولأننا نهتم بجودة المحتوى فالعملية هذه في الفترة هادي هي عملية يدوية، تتم فقط بعد تقديم نموذج من خلاله يتم مراجعته والرد عليه. 

نسعدوا جداً بتقديمك معنا كمدرب، وإنضمامك للفريق عبر ملء النموذج من هنا 

كيف نقدر نتابع التقدم متعي في التدريب؟ 

التدريبات في حصة مش مجرد فيديوات تحضرها وتسكر، حصة عبارة عن بيئة تعليم تفاعلية ومتكاملة، لانك تحضر الفيديوات، تقرى المقالات الخاصة بالتدريب، تشارك في النقاش مع الآخرين وتعطي رايك، وتحل التمرينات، وجزاء كل هدا هو لوحة معبية انجازات.  

شن هيا التمرينات وكيف نحلها؟ 

غالبا بعد كل موضوع في التدريب يكون فيه تمرين، الأسئلة متعه عبارة عن أسئلة اختيار متعدد، صح أو خطأ، وغيرها. بعض التدريبات تشترط انك تحل جميع التمرينات الموجودة فيها بش تحصل شهادة وبعضها لا. 

الأسئلة الخاصة بالتمرينات عبارة مراجعة لمحتوى الدروس اللي خديتها في التدريب واحني واثقين انها مش حتصعب عليك.